Дэлхийн анир

“Vale” компани далан нурах эрсдэлтэй байсныг гурван сарын өмнө мэдэж байжээ

Бразилын зүүн өмнөд нутаг дахь уурхайн далан нь нурах эрсдэл өндөр байсныг  уул уурхайн “Vale” компани бүр өнгөрсөн оны 10 дугаар сард мэдэж байжээ. Энэ тухай “Reuters” агентлаг тус компанийн дотоод баримт бичгүүдээс иш татан даваа гарагт мэдээлэв.
2018 оны 10 дугаар сарын тайлангаас үзвэл, далан нурах эрсдэл “Vale” компанийн аюулгүй байдлын бодлогод заасан зөвшөөрөгдөх хамгийн дээд түвшнээс хоёр дахин өндөр байжээ. Уг даланг “онцгой анхааралд авах” төрөлд оруулж, ашиглалтаас гаргахаар төлөвлөж байсныг “Reuters” агентлаг онцлон тэмдэглэсэн байна.
Далан нурах нь 100 гаруй хүний аминд хүрч, компанид 1.5 тэрбум ам.долларын хохирол учруулж болзошгүй гэж баримт бичигт мөн дурджээ. “Reuters” агентлагийн энэ мэдээлэлд тайлбар өгөх хүсэлтэд “Vale” компани хариу өгөөгүй байна. Эрсдэлийн талаарх мэдээллийг компанийн удирдлагуудад өмнө нь өгсөн байсан эсэх нь тодорхойгүй байгаа аж.
Бразилын Минас-Жерайс мужийн Брумадинью суурин дахь төмөрлөгийн үйлдвэрийн хаягдал бохир усны далан нэгдүгээр сарын 25-нд нурсан юм. Хамгийн сүүлийн мэдээллээр, 165 хүн амиа алдаж, 160 хүн сураггүй болсонд тооцогдож байна.
Д.Жаргал
Tags

Related Articles

Back to top button
Close